Nagpaabot na usab og patimbaya si Russian President Vladimir Putin ngadto kang US President-Elect Donald Trump, labot sa pagkadaog niini sa bag-ohay lamang nga natapos nga 2024 US Presidential Elections.
Atol sa plenary session sa Valdai International Discussion Club sa Sochi, Russia, subling gihatagan og higayon ni Putin nga andam matud pa kini makig-trabaho sa bisan kinsang head of state nga ginasaligan sa mga tawo sa Amerika.
Mibilib sab si Putin sa kinaiya ni Trump human ang duha ka mga assassination attempts ngadto sa iyahang kinabuhi samtang nagapangampanya kini ug gidayeg sab ni Putin si Trump isip “courageous man”.
Nakaandam sab ang Russian Leader nga adunay mapahigayong mga diskusyon uban si Trump, lakip sab nga gibutyag ni Putin nga deserve matud pa nga mahatagan og atensyon ang pag-angkon ni Trump nga makatabang sab kini aron nga maundang na ang giyera tali sa Ukraine ug Russia.
Kahinumdumang niadtong panahon sa kampanya ni Trump, pabalik-balik niining ginahisgutan nga kaya sumala pa niining undangon ang mga giyera sulod lamang sa usa ka adlaw, apan wala na niini gidetalye og paunsa kini niya buhaton.
