Gikumpirma ni Interior Secretary Jonvic Remulla kagahapong adlawa nga nagdumili ang Russia ug Estados Unidos sa pagdawat sa Russian vlogger nga si Vitaly Zdorovetskiy alang sa iyahang deportation.
Kahinumduman nga nadakpan si Zdorovetskiy niadtong Abril gumikan sa iyahang mga iligal nga stunt, lakip na ang pagpangharas sa mga Pilipino.
Gikatakda siyang moatubang sa korte sa sunod semana alang sa tulo ka kaso sa unjust vexation, nga adunay silot nga pagkabilanggo nga molungtad gikan sa tulo hangtod dose ka bulan.
Gisiguro usab ni Remulla nga prisohon si Zdorovetskiy.
Sa miaging higayon, mihangyo ang vlogger nga ibasura ang mga kaso batok kaniya gumikan sa mental health concerns, apan giinsistir ni Remulla nga dili angay pasagdan ang iyahang ginabuhat.
