Gilusad pag-usab sa Russia ang usa ka dakong opensiba pinaagi sa sunod-sunod nga missile ug drone attacks batok sa kaulohang siyudad sa Kyiv, nga misangpot sa pagkamatay sa dili moubos sa 10 ka tawo ug kapin sa 50 pa ang naangol, sumala sa mga opisyal sa Ukraine.
Matud pa kang Presidente Volodymyr Zelenskyy, nakadawat na daan ang gobyerno sa Ukraine og intelligence reports nga nagpakita nga dugay nang gipangandaman sa Russia ang maong pag-atake. Busa, giaghat niya ang tanang residente nga magpabiling alerto ug motuman dayon sa mga air raid warnings aron malikayan ang dugang nga mga biktima.
Dugang pa niini, grabe ang kadaot nga nahimo sa mga pag-atake human maigo ang mga residential buildings, medical facilities ug uban pang importante nga imprastraktura sa Kyiv. Lakip sa mga naangol ang mga medical workers ug emergency responders nga unang mitubag sa maong trahedya, samtang nagpadayon ang rescue operations sa mga lugar nga adunay nagun-ob nga mga estruktura.
Sumala pa sa mga awtoridad sa Ukraine, daghang mga residente ang midangop sa mga estasyon sa subway ug ubang evacuation centers aron makalikay sa walay hunong nga pagpamomba pinaagi sa missiles ug drones. Sa kasamtangan, nagpadayon ang pagpangita sa mga rescuers sa mga tawo nga gituohang natabonan sa mga nagun-ob nga bilding, samtang gilauman pa nga mosaka ang ihap sa mga namatay ug naangol samtang nagpadayon ang rescue ug retrieval operations.
Sa pikas bahin, gipahayag sa Russian Ministry of Defense nga ang ilang operasyon nagtumong lamang sa military ug energy infrastructure sa Ukraine. Apan, gilimod kini sa gobyerno sa Kyiv ug gipasiugda nga kadaghanan sa mga naapektuhan sa pag-atake mga sibilyan ug mga residential areas.
Sa kasamtangan, nanawagan si Zelenskyy sa mga kaalyado sa Ukraine nga paspasan ang paghatag og dugang nga air defense systems aron mapalig-on ang depensa sa nasod batok sa nagkakusog nga opensiba sa Russia.
Kahinumduman, nagpadayon ang gubat tali sa Russia ug Ukraine sulod na sa kapin upat ka tuig, uban sa nagkagrabeng mga pag-atake ug opensiba sa duha ka panig.
