Mitubag ang Russia labot sa pamahayag ni US President Donald Trump human gitawag niini nga “nawala na sa kaugalingon” si Russian President Vladimir Putin gumikan sa padayon nga pag-atake sa Ukraine.
Sumala pa ni Dmitry Peskov, ang tigpamaba ni Putin, nga posible matud pang nakasinati lamang si Trump og “emotional overload.”
Depensa sab ni Peskov, nga ang ilahang gihimo usa lamang sumala pa ka pagpanimalos sa unang lihok sa Ukraine.
Kahinumduman nga nadismaya si Trump sa gihimong pag-atake sa Russia diin migamit kini og 367 ka drone ug missile nga miresulta sa pagkamatay sa 13 ka mga tawo.
Gipunting sab ni Ukrainian President Volodymyr Zelensky, nga rason og nganong nagmagahi ang Russia gumikan sumala pa sa kahilom sa US ug sa pipila pa ka mga kaalyado nilang nasud.
