Russia, gitay-og og magnitude 8 nga linog; Phivolcs, walay na-detect nga tsunami sa kadagatan sa Pilipinas

Gipakalma sa Phivolcs ang kahadlok sa publiko kabahin sa posibleng tsunami human sa kusog nga linog nga adunay magnitude 8.0 nga miigo sa Russia.

Nasayran nga natala ang maong linog kaganihang alas-7:25 sa buntag sa sidlakang baybayon sa Kamchatka.

Kini adunay gilawmon nga 74 ka kilometros ug tectonic ang hinungdan.

Matod sa Phivolcs, padayon nila nga ginabantayan ang kahimtang karon bisan pa man walay inisyal nga hulga sa dagkong balud nga makaapekto sa mga baybayon sa Pilipinas.

Bisan pa niini, subay sa laing datos nga gikan sa US Geological Survey (USGS), posible nga adunay balud nga moabot og 0.3 hangtod 1 ka metro nga mamahimong makaabot sa Pilipinas, nga resulta sa kusog nga linog sa Russia.