Gikumpirma sa Bureau of Immigration (BI) nga nakabalik na sa Pilipinas si retired police Colonel Royina Garma, ang kanhi general manager sa Philippine Charity Sweepstakes Office (PCSO) nga giimbestigahan sa iyang pagkalambigit sumala pa sa drug war ni kanhi Pangulong Rodrigo Duterte ug giingong utok sa pagpatay kang kanhi PCSO board secretary Wesley Barayuga niadtong 2020.
Miabot si Garma sa Ninoy Aquino International Airport (NAIA) gikan sa Los Angeles, California Sabado sa gabii, Setyembre 6.
Gipaambit sa Immigration ang litrato ni Garma sa ilang opisyal nga Facebook page.
Kahinumdoman, nga misibat pa gawas sa nasud si Garma sa atol sa imbestigasyon kabahin sa mga gikaingong pagpamatay atol sa war on drugs sa kanhing administrasyon diin naapil ang iyang pangalan.
Sa House Quad Committee inquiry, gibutyag ni Garma nga gikasugo matud siya sa kanhi Pangulo nga mangita og usa ka opisyal aron ipatuman sa tibuok nasud ang Davao model sa war on drugs. Ilalom niini, aduna sumala pay reward money matag mapatay nga drug suspect.
Apan, nadakpan si Garma sa mga awtoridad sa California, USA niadtong Nobiyembre 7, 2024 tungod sa iyang nakanselar nga visa.
Lima ka bulan human sa iyang pagdakop, giingon sa iyang abogado nga nangayo siya og asylum didto sa maong nasud.
Sa pagkakaron, nag-atubang si Garma sa kaso nga pagpatay ug frustrated murder nga adunay kalabotan sa iyang giingong sugo sa pagpatay kang Barayuga.
