Gikabutyag nga usa ka dakong dungog ang naangkon sa Rizal Park sa Maynila, homan kini gideklara nga ikaduha sa most search park subay sa Google’s Year in Search 2024.
Ang nahisgutang kalampusan ang nagbutang sa Rizal Park nga pinakaunang parke sa Pilipinas nga nahilakip sa prestihiyosong Top 10 kalibutan.
Giilang Luneta Park ang halapad nga lugar nga adunay sukod nga mosobra sa 50 ka ektarya ug nagpaila sa adunahang kultura ug kasaysayan sa nasud.
Nahilakip na dinhi ang monumento ni Dr. Jose Rizal, ang gikunsederang nasudnong bayani nga gipalibutan sa maanindot nga garden, makasaysayanong museo ug library nga mihatag ug importansya sa adunahang kultura sa Pilipinas.
Samtang ang uban pang Top 10 Most Searched Parks in the World sa Google Maps niadtong tuig 2024 mao ang: Central Park, USA
Rizal Park, Pilipinas
Ohori Park, Japan
Park Güell, Spain
Odori Park, Japan
Red Rocks Park and Amphitheatre, USA
Plaza Botero, Medellín, Colombia
Stanley Park, Canada
Nara Park, Japan
Hyde Park, United Kingdom.
Ang pag-ila sa Rizal Park sa global ranking ang nagpamatuod sa ka-importante niini isip national treasure ug nagpadayong paborito sa mga lokal ug langyaw nga turista.
