DAVAO CITY – Patay ang usa ka rider nga kusog kaayong nagpadagan sa iyang motorsiklo ug mibangga sa kasugat nga bonggo didto sa National Highway, Tagnanan, Mabini, Davao de Oro kaganinang buntag.
Ang biktima giila nga si Lawrence Oliver Gambong Rabino, alyas “Gorgor”, hamtong ang panuigon, minyo, ug molopyo sa Maniki, Kapalong, Davao del Norte ug membro sa riders club nga ginganlan ug Jekspeed Kapalong.
Subay sa imbestigasyon, nga ang ilang grupo nagpahigayon ug no rules rides paingon sa Davao Oriental ug migikan sa lungsod sa Kapalong kapin alas singko ang takna sa kadlawon.
Bandang alas sais ang takna sa buntag samtang padayon sa pagpadagan sa ilang tagsa tagsa ka mga motorsiklo ang nasangpit nga grupo sa mga riders, ilang nakit-an ang biktima nga mipaturatoy sa pagpakusog sa dagan sa iyang motorsiklo ug misaylo sa pikas linya sa dalan.
Gumikan sa kadanlog sa dalan, misarasay ang motorsiklo nga gimaneho sa biktima ug mibangga sa usa ka gikasugat nga bonggo.
Tungod sa kakusog sa impak sa pagkabangga, naka-agom ug samad sa nagkadaiyang parte sa iyang kalawasan ang biktima nga maoy hinungdan sa iyang hinanaling kamatayon. Tungod sa maong panghitabo, wala naa gipadayon sa nasangpit nga grupo ang ilang rides.
Gidala na sa ilang panimalay ang patay’ng lawas sa biktima.
