Gipaspasan na sa mga otoridad ang padayon nga retrieval operation alang sa magtiayong nabilin sulod sa ilang bao-bao human kini malubong sa dahilig nga yuta nga nakahugno sa Bukidnon-Davao Road, daplin sa Overview, Sitio Kipolot, Barangay Palacapao, lungsod sa Quezon, Bukidnon.
Giila ang mga biktima nga sila Ely Loberanez Ubatay, 60-anyos, ug Thelma Badana Ubatay, 60-anyos, nga pulos residente sa Purok 9, Minalong, Kahusayan, Kitaotao, Bukidnon. Ang magtiayon nagbiyahe unta padulong sa lungsod sa dihang kalit nga midahili ang yuta, nga mipaingon sa ilang giagian ug midala sa ilang sakyanan sa ubos nga bahin sa bukid.
Matod sa Municipal Public Safety Office (MPSO), nagtinabangay na ang MDRRMO, DPWH, PNP, Philippine Army, BFP, ug Municipal Engineering Office sa pagpanglimpyo ug pag-abli pag-usab sa access roads aron masiguro nga makaagi ang mga residente ug mahatagan ug lugar ang mga rescuers.
Gibanabana nga 100 metros ang gilawmon ug 400 metros ang gilapdon sa nahapsay nga yuta, samtang 100 metros usab ang naguba nga parte sa dalan, hinungdan nga hangtod karon not passable gihapon kini sa tanang klase sa sakyanan.
Nahitabo ang landslide alas 7:59 sa gabii niadtong Sabado, Oktubre 18, 2025, ug hangtod karon padayon pa ang pagpangita sa magtiayon nga gituohang naapil sa lawom nga bahin sa nahugno nga yuta.
Ang mga residente duol sa lugar nagpabilin sa kahadlok ug kabalaka nga basin adunay mosunod pa nga pagdahili samtang padayon ang ulan ug pag-uyog sa yuta.
