Usa ka 74-anyos nga lalaki sa India ang nagpakaaron ingnon nga namatay ug nagpahimo og peke nga lubong aron masuta kung kinsa ang magbangutan sa iyang “pagpanaw.”
Nahibulong ang mga residente sa Konchi, Bihar sa dihang mitambong sila sa prusisyon ug kalit nga mitindog gikan sa Lungon si Mohan Lal, usa ka kanhi sundalo sa Air Force.
Didto nila nasayran nga ang lubong usa ra diay ka eksperimento aron makita niini kung kinsa gayud ang tinuod nga naghatag og bili kaniya.
Sumala kang Mohan, gusto niini nga masinati kung giunsa siya pagtahod sa mga tawo sa wala pa siya mamatay.
Gitabangan siya sa iyang mga paryente sa pagpakaylap sa balita ug pag-andam sa prusisyon.
Miuban ang gatusan ka mga residente, ug isip pagpangayo og pasaylo, nagpakaon si Mohan alang sa tanan nga mitambong.
