Gipagawas na karong adlawa sa Supreme Court (SC) ang resulta sa 2025 Bar Examinations diin 5,594 sa 11,425 ka examinees ang nakapasar, nga tugbang sa 48.96% nga passing rate.
Nanguna sa mga bag-ong abogado si Jhenroniel Rhey Sanchez sa University of the Philippines nga adunay 92.70 average grade.
Ang pag-abli sa mga resulta gipangulohan ni Associate Justice Amy Lazaro-Javier, Chairperson sa Bar Exams Committee, sa en banc session sa Korte Suprema.
Gipahigayon ang eksaminasyon niadtong Setyembre 2025 sa lain-laing regional testing centers gamit ang digital platform nga Examplify, nga nagtinguha nga mahimo ang proseso nga mas accessible ug mas luwas.
Gikonsidera kini nga makasaysayan tungod kay kini ang adunay labing taas nga ihap sa mga examinees sa kasaysayan sa Bar, nga miabot sa kapin 11,000.
Kauban sa listahan sa mga nakapasar, gipagawas usab ang talaan sa topnotchers ug top performing law schools.
Ang mga bag-ong mga abogado gilauman nga mopailawom sa clearance process ug opisyal nga manumpa sa umaabot nga mga semana.
