DAVAO CITY – Magpasaka ug kaso ang mga resort owners sa Island Garden City of Samal batok sa mga Chinese contractors ug mga personahe sa DPWH ug DENR nga nagdumala sa Samal Island-Davao City Connector project tungod sa gikatahong trespassing, harassment ug intimidation.
Sa statement nga gipagawas kagahapon sa pamilyang Lucas-Rodriguez, misulod sa ilang resort ang mga nahisgutan uban ang pipila ka mga armadong escort aron magpahigayon ug borehole drilling sa lugar niadtong Oktubre 4 apan walay gipakita nga permit ang mga opisyal.
Wala hinuon nadayon ang pag-inspeksyon sa lugar sa dihang nakig-istorya ang mga tag-iya sa mga contractors. Samtang gipanghimakak sab sa DPWH Davao ang maong alegasyon nga pugsanay nga pagpasulod sa mga Chinese contractors.
Matud pa ni DPWH-Davao spokesperson nga si Dean Ortiz, walay komosyon nga nahitabo tali sa duha ka partido. Dugang pa niya nga tumong sa maong pagbisita ang paginspeksyon alang sa pagatukurong Davao-Samal Bridge.
Gikwestyon sab sa pamilya ang nahimong kalamigitan sa Philippine Coast Guard sa maong alegasyon apan gipaklaro sab sa buhatan nga anaa lamang ang mga sakop sa Coast Guard aron maghatag ug assistance.
Sa pikas bahin, gikaingon nga dugay nang giuyunan sa pamilyang Lucas-Rodriguez ang maong proyekto apan nanghinaot sab sila sa mahitabong realignment aron mamenosan o dili kaha mapugngan ang posibleng kadaot nga hatud sa maong proyekto sa mga kadagatan sa Samal Island.
Wala matud pa nakigdayalogo ang mga otoridad ngadto sa pamilya mahitungod sa posibleng realignment.
Gikwestyon sab ang pag-apruba sa proyekto nga walay pagtugot gikan sa Protected Area Management Board.
via || Bombo LJ Florendo
