DAVAO CITY Gisugdan na sa Eastern Mindanao Command (EastMinCom) ang pag-host sa Republic of the Philippines-Republic of Indonesia Border Crossing Committee Chairmen’s Conference sa usa ka Mall sa Lanang ning siyudad nga matapos sa Enero 11.
Una ng gipangunahan ni Lt. Gen. Benjamin Madrigal, chief sa Eastern Mindanao Command ug Chairman, ang Philippine delegation samtang ang Indonesian delegation gipangunahan ni Ramd Didik Setiyono S.E., M.M., commander sa Eastern Fleet Command.
Matud pa kang Maj. Ezra Balagtey, tigpamaba sa EastMinCom, nga tumong sa maong conference nga ma-review ang mga isyu ug makamugna ug rekomendasyon aron nga mapalambo ang mutual cross-border cooperation.
Kalakip sab sa ilang hisgutan ang sustainable maritime defense ug security cooperation sa duruha ka mga nasud ilabi na sa Celebes Sea.
Kahinumduman nga sa milabay nga Hulyo 6, 2017, gilunsad sa Pilipinas ug Indonesia ang maritime patrol sa bag-ong 600-km route aron nga mapalig-on pa ang seguridad partikular na sa boarder tali sa duruha ka mga nasud.
Nasayran kang Balagtey nga ang border agreement tali sa Pilipinas ug Indonesia ang nagsugod sukad pa kaniadtong 1975.
