Gipaningkamotan pag-usab ni Kamanggagawa Party-list Representative Eli San Fernando ang pagtukod og pantay nga minimum wage sa tibuok Pilipinas.
Matod pa niini, kini usa ka lakang padulong sa mas makatarunganon ug inklusibong ekonomiya diin dili na magdepende sa rehiyon ang kahimtang sa sweldo sa mga trabahante.
Sa pagdungog sa Senate Committee on Labor, Employment and Human Resources Development, gilantaw ni San Fernando nga dako kaayo ang kalainan sa sweldo tali sa mga rehiyon.
Gipasabot niini nga pareho ra ang kakapoy sa mga trabahante sa Manila ug sa probinsya, busa patas lang nga magkapareha usab ang ilang madawat nga suweldo.
Iyang gisugyot ang pagpatuman og national minimum wage policy nga magtakda og parehas nga sweldo sa tanang mag-uuma, mamumuo, ug trabahante bisan asa sila nahimutang.
Matod pa sa kongresista, dili ang lokasyon ang angay basihan sa suweldo, kundili ang dignidad sa pagpanarbaho.
