‘Not all heroes wear capes’, kini ang sagad komento sa netizens human nga nasaksihan sa viewers pagrescue sa usa ka TV reporter ngadto sa usa ka babayeng natrap sa iyang sakyanan human nga pugsanon kining mitabok luyo pa man sa ilabihang pagbaha sa Atlanta.
Samtang naghatod sa iyang report si Bob Van Dillen, namatikdan niining dunay babaye ang natanggong sulod sa iyang sakyanan gumikan pugsanon kining makatabok.
Apan, sa wa damhang higayon, nalisang na ang maong babaye rason nga nanawag kini og tabang sa 911 ug madungog ang kusog nga singgit niini.
Sa way pagduha-duha, giundang ni Dillen ang iyang report ug misalom sa baha.
Dako ang pasalamat sa babaye ngadto sa maong reporter.
Gitawag sab nga ‘hero’ kon bayani si Dillen gumikan sa gipakita niining kaisog bisan pa man nga ang kinabuhi niini ang posible sab nga maalaot.
