Gibutyag sa Palasyo sa Malacañang nga fake news ang report nga nahanaw ang P1.7 trilyon nga kwarta sa Philippine Stock Market tungod sa mga isyu sa korapsyon sa nasud.
Sumala kang Special Assistant to the President for Investment and Economic Affairs Secretary Frederick Go, nakaistorya siya ni SEC Chairman Francis Lim ug gikanayon mismo ni Lim nga biktima siya sa fake news nga nagkatag sa social media.
Nagpagawas si Lim og pahayag nga gibutyag nga nahanaw ang P1.7 trilyon sa stock market, apan iyang gi-basehan niini ang nabasa lamang sa social media post.
Gipatin-aw ni Go nga dili tinuod nga 12% ang nawala sa shares index sa nasud gikan Agosto 11 hangtod 29, gumikan anaa lamang sa 1.5%. Sumala pa ni Go, dali ra kining ma-verify ug kahibalo na ang tanan sa financial market kabahin niini.
Wala usab nagtuo si Go nga nahanaw ang mga investment pledges sa nasud o nga adunay mga investor nga mi-atras sa ilang pamuhunan. Sa tinuod sumala pa, nagpadayon pa gihapon ang mga investor sa pagbutang og kapital sa Pilipinas.
Gikanayon ni Go nga adunay pipila ka mga investor nga niundang og hunahuna sa ilang pag-invest tungod sa mga isyu nga gipang-atubang sa nasud.
Apan, gipadayag niini nga kumpyansa ang economic team sa administrasyon nga kung maresolba ang mga isyu, magpadayon gihapon ang mga investor sa ilahang mga plano sa Pilipinas.
