Gikanayon ni house prosecutor ug Bicol Saro Party-list Rep. Terry Ridon nga dili mahimong ipasa ni Vice President Sara Duterte ngadto sa iyang mga tauhan ang responsibilidad sa giingong sayop nga paggamit sa confidential funds.
Sumala pa, dili lamang ang mga Special Disbursing Officer o SDO ug accountant ang angay basulon tungod kay gikinahanglan ang pirma sa hepe sa ahensya sa dili pa mapagawas ang pondo o ma-isyu ang tseke. Gibutyag usab ni Ridon nga adunay testimonya nga ang kataposang pag-apruba sa pagpagawas sa confidential funds gikan mismo sa bise presidente.
Gisusi sa prosecution ang kapin 612.5 milyon pesos nga confidential funds, diin 500 milyon pesos alang sa Office of the Vice President ug 112.5 milyon pesos alang sa Department of Education atol sa panahon ni Duterte isip Education Secretary. Dugang pa, giingon sa prosecution nga kulang ang mga dokumentong makapasabot kung nganong gipagawas ang maong dakong kantidad sa pondo.
Giinsistir ni Ridon nga kinahanglan masusi kung kinsa gyud ang adunay responsibilidad sa paggamit sa maong pondo ug dili lamang ang mga ordinaryong kawani ang manubag. Sa pagkakaron, nagpadayon ang impeachment proceedings samtang gisusi ang mga alegasyon kalabot sa paggamit sa confidential funds.
