DAVAO CITY – Pormal na nga gi-anunsiyo ni Davao City first district Rep. Paolo “Pulong” Duterte nga mobalhin na kini sa National Unity Party (NUP).
Mapasalamaton kini Pulong kinsa chairperson sa Hugpong Sa Tawong Lungsod (HTL) nga sagupon siya sa NUP. Nasayran nga ang NUP mao ang ikatulong pinakadako nga bloc sa House of Representatives gawas sa PDP-Laban ug Partylist Coalition Foundation.
Nasayran nga si Pulong nga unang miyembro sa House of Representatives, ang napili isip House Deputy Speaker for Political Affairs.
Gi-angkon sa batang Duterte nga adunay uban usab nga partido ang buot nga mokuha kaniya.
Una na sab nga nagmugna si Pulong ug Duterte Coalition diin miyembro niini sila si Davao City Representatives Isidro Ungab ug Vincent J. Garcia, Davao Oriental Rep. Corazon N. Malanyaon, Compostela Valley Rep. Manuel E. Zamora, Davao Occidental Rep. Lorna P. Bautista, Dumper Philippines Taxi Drivers Association Party-list Rep. Claudine Bautista, ug Marino Party-list Reps. Sandro Gonzales ingon man Anton Lopez.
Tumong sumala pa sa maong coalition nga magkahiusa sila gumikan sa tensiyon sa Speakership ug Committee Chairmanships.
