Mibarug si La Union Representative Paolo Ortega nga dili “fishing expedition” ang pagpangayo og subpoena sa House prosecution panel alang sa mga financial ug tax records ni Bise Presidente Sara Duterte. Sumala pa ni Ortega, gikinahanglan ang maong mga rekord aron mapakita ang mas kompleto nga hulagway kabahin sa pinansyal nga kahimtang sa Bise Presidente ug sa iyang pamilya.
Dugang pa niini, iyang giingon nga ang mga ebidensya nga migawas sa mga hearing sa House Justice Committee nagsilbing unang bahin pa lamang sa mga ipresentar sa prosecution panel atol sa trial proper. Matod pa ni Ortega, anaa na sa hugna sa pagtaral ang kaso ni VP Sara, busa angay lamang nga ipakita ang mga dokumento nga may kalabutan sa mga alegasyon, lakip na ang financial records.
Sa kasamtangan, nagpaabot pa ang mga partido sa pinal nga desisyon sa Senate Impeachment Court kabahin sa gihangyo nga subpoena sa House prosecution panel alang sa dugang nga mga rekord. Dugang pa ni Ortega, andam ang prosecution team nga gamiton ang mga anaa nang rekord kung dili aprobahan sa korte ang dugang nga pagpangayo og mga dokumento.
