DAVAO CITY – Pabilin sumala pa ang pagsalig ni Davao del Norte 2nd District Representative Antonio “Tonyboy” Floirendo Jr. sa justice system sa nasud ug nagtuo kini nga pabilin siya nga inosente batok sa kaso nga gipasaka kaniya ni House Speaker Pantaleon Alvarez.
Matud pa kang Floirendo nga sayod si Pangulong Rodrigo Duterte sa bangi nila ni Alvarez apan dili niya buot nga malambigit pa ang pangulo sa ilang personal nga problema.
Hinuon abli sumala pa ang kongresista nga sulbaron ang ilang nahimong bangi ni Alvarez.
Kahinumduman nga gipagula niining milabay nga adlaw ang warrant of arrest sa kasong graft batok kang Floirendo apan nakaduso kini sa piyansa nga P30,000.
Sa kaso nga giduso ni Alavarez, gikanayong nawad-an ang gobyerno ug P106,167,191 matag tuig tungod sa Tadeco nga gipanag-iyahan sa mga Floirendo.
Gisulod sumala pa sa nahisgutan nga kompanya ang joint venture agreement nga arkilan ang parcel sa luna gikan sa Bureau of Correction (BuCor) alang sa ilang banana plantation sa milabay nga Hulyo 11, 1969.
Nasayran sab nga ang kontrata gi-renew kaniadtong May 21, 2003, nga nagkanayong ang BuCor adunay portion sa production sa nahisgutan nga banana plantation sa kantidad nga P26,541,801 ug mosaka sumala pa kini sa 10% matag lima ka tuig.
Tungod niini, girekomenda sa Commission on Audit ug Department of Justice ang kanselasyon sa kontrata.
Una ng gibutyag ni Floirendo nga gi-abusohan ni Alvarez ang iyang gahum.
Dili na sab sumala pa mohatag ug dugang komento ang kongresista kalabot sa isyu nga plano ni Alvarez nga mo-abli ug investment sa Panabo atubangan sa Tadeco.
