DAVAO CITY – Mihangyo ang lokal nga panggamhanan ngadto sa mga nagkadaiyang religious group dinhi sa Dakbayan sa Davao nga pakusgan pa ang ilang security measures aron mapugnan nga malusutan sila sa mga terorista.
Kini subay sa impormasyon gikan sa lokal nga panggamhanan nga kasagarang gina-target sa mga terorista ang mga religious convergence site sama sa simbahan ug mga masjid.
Mihangyo usab sila ngadto sa mga manimbahay nga magmatngon sa ilang palibot, ilabi na sa mga nagasuot og jacket, naay dalang backpack, ug uban pang mga butang nga makatago og eksplosibo sama sa granada o di kaha improvised explosive device kon IED.
Dugay na usab nga nagpagula og polisiya kalabot sa pagsul-ob og jacket ug pagdala og backpack ang lokal nga panggamhanan ngadto sa mga maximum security zones, lakip na ang San Pedro Street ug Roxas Night Market.
Nagpasidaan usab ang Davao City LGU nga posibleng mahitabo ang mga pagpang-atake sa mga dautang elemento sa uban pang mga pangpublikong lugar sama sa palengke, vaccination sites, malls, parks ug uban pa.
Ang maong pagpahimangno, taliwala sa pagkadawat sa Japanese government ug intelligence report nga adunay posibleng pagahimuong terror attacks sa unom ka mga nasud sa Southeast Asia, lakip na ang Pilipinas.
