DAVAO CITY – Posible sumala pa nga manghatag ang lokal nga panggamhanan ug “ration cards” luyo sa gipatuman nga community quarantine tungod usab sa bahad sa pagkuyanap sa coronavirus disease (Covid-19) pandemic.
Sumala pa kang Mayor Sara Duterte-Carpio nga gimandoan na niya ang City Social Welfare and Development Office (CSWDO) nga mag-andam ug cards, human nga pipila sa mga local government units sa Luzon ang kasamtangan na nga nanghatag ug card sa matag pamilya.
Hinuon gikanayon sa Mayor nga magdepende pa gihapon kini sa mamahimong rekomendasyon sa health consultants sa siyudad.
Apan ayha pa nahitabo ang Covid-19 outbreak, nagapanghatag na matud pa ang CSWDO sa nahisgutan nga cards ilabi na panahon sa kalamidad.
Gitataw sa Mayor nga kwalipikado lamang nga makadawat sa maong card mao kadtong mga kabus ug pamilya nga labing maapektohan sa economic impact sa virus.
Sa higayon nga madawat na ang maong card, kinahanglan sumala pa kini nga taguan sanglit dili na kini mabaylo-an.
