Nangandam na ang Qatar sa pagsugod sa ikaduhang hugna sa Gaza ceasefire agreement tali sa Hamas ug Israel.
Gipahayag ni Foreign Ministry official Majed al-Ansari, nga nakita niini ang maayo nga kahimtang gumikan sa malinawon nga pagpatuman sa unang hugna sa ceasefire.
Giklaro usab niini, nga wala pa nagsugod ang negosasyon sa ceasefire ug mamahimo nga sa mga mosunod nga adlaw, ilaha na kini nga pagasugdan.
Pipila lamang sa namatikdan niini mao ang dugang humanitarian aid sa Gaza gumikan daghan pa gihapon ang naapektohan sa nahisgutan nga kagubot.
Samtang, una nga gipahayag ni Israeli Foreign Minister Gideon Saar, nga andam na kini nga mutambong sa panag-estorya alang sa ikaduhang hugna sa negosasyon sa Gaza deal.
Kahinumduman, nga nagbaton ug tulo kabahin ang ceasefire deal sa Gaza kung diin nagpagawas ug bihag ang mga Hamas, bugti usab ang mga Palestino nga nabilanggo sa Israel.
Samtang, ang katapusang bahin sa ceasefire mao ang hingpit sa pagpapahawa sa mga sundalo sa Israel nga nahimutang sa Gaza.
