Pwersa sa China nagpalupad og flares samtang nagpatrolya ang eroplano sa PCG

Nagpalupad og flares ang pwersa sa China samtang nagpatrolya sa kadagatan ang eroplano sa Philippine Coast Guard duol sa Mischief Reef sa West Philippine Sea.

Sumala ni Rear Admiral Jay Tarriela, delikado ang insidente tungod kay dili masiguro kung asa moabot ang mga flare nga posibleng makaigo sa aircraft.

Gawas pa niini, naghatag usab og radio challenge ang Chinese forces ug giingong sila adunay “indisputable sovereignty” sa lugar nga usa ka pahayag nga hugot nga gisupak sa PCG.

Gibutyag ni Tarriela nga ang Panganiban Reef anaa sulod sa exclusive economic zone (EEZ) sa Pilipinas.

Ang maong bahin sa kadagatan, nga kaniadto giingong silunganan lamang sa mga mananagat niadtong 1990s, nahimo na karon nga hingpit nga military base sa China.