Nalapnos ang lawas sa usa ka 24-anyos nga lalaki nga Persons With Disability (PWD) human matulak sa nagdilaab nga pugon sa usa ka koprasan sa Caburan Small, Jose Abad Santos, Davao Occidental, alas 4 sa kaadlawon miadtong Hulyo 19, 2025.
Base sa imbestigasyon sa JAS Municipal Police Station, giingon ni Police Corporal John Will Pepito nga samtang nagkopras si alyas “Arman”, gi-bully kini ni alyas “Jerick”, 23 anyos, nga misangpot sa ilang panagsangka.
Giingon nga nag-ilog og sundang ang duha nga misangpot sa pagkahulog ni Arman sa nagdilaab nga pugon.
Dali usab nga nakaresponde ang kapulisan ug nadakpan dayon ang suspetsado.
Apan, bisan pa sa insidente, napugngan ang pagsaka sa pormal nga kaso batok sa suspek human magkasabot ang mga ginikanan sa biktima ug suspek nga dili na lang ipadayon ang pagsang-at sa korte tungod kay magkumpare ug kumare ang ilang mga pamilya.
Nasayran nga nagdesisyon ang duha ka panig nga husayon na lang ang maong hitabo sa barangay aron mapadayon ang ilang maayong relasyon isip maghigala.
