Miguwa na ang resulta sa hair follicle drug test ni Davao City 1st District Rep. Paolo “Pulong” Duterte nga gihimo kini sa Hi-Precision Diagnostics Center, diin nag-negatibo ang resulta niini.
Ang maong drug test, gipahigayon kini pinaagi sa hair samples nga maoy gikolekta gikan kang Pulong niadtong nakalabayng bulan, diin tataw sumala pa nga wala gayud nalambigit sa bisan unsang paggamit sa iligal nga droga ang mong magbabalaod.
Nasayran sab nga ang maong eksaminasyon maoy nailhan nga Hair 7 Drug Panel Test, diin gipahigayon kini sa Omega Laboratories, usa ka certified testing facility.
Kahinumdumang, gibuhat matud pa kini ni Pulong aron nga hagiton ang mga kaubanan niining magbabalaod nga mukasa usab sa maong hair follicle drug test, aron nga masuta og limpyo ba gayud kini.
Una nang mikasa usab sa hagit ni Duterte ang kaatbang niini sa umalabot nga eleksyon nga si Rep. Migs Nograles, apan pagpaklaro pa niini nga gibuhat lamang niya ang maong pagpailawom sa maong drug-test aron ipakita sa katawhan nga limpyo kini ug dili gumikan sa hagit sa iyahang kaatbang nga mao si Congressman Pulong Duterte.
