Gipapahawa na sa serbisyo si Police Corporal Marvin Perez, nga maoy giilang responsable sa pagpamusil ug pagpatay sa iyahang uyab nga si alyas Dianna, 39-anyos, niadtong Mayo 25 sa Palma Gil Street, Barangay 13-B, ning dakbayan.
Ang maong impormasyon gikompirma ni Davao City Police Office (DCPO) Director PCol. Hansel Marantan.
Sumala pa ni Marantan, gawas sa pagpatangtang niini sa serbisyo, wala na usab si Perez katungod nga makadawat og mga benepisyo gikan sa kapulisan.
Kahinumduman nga nakaangkon og daghang samad sa lawas ang biktima human kini gipusil sa nawong, abaga, liog ug dughan, nga miresulta sa iyahang hinanaling kamatayon.
Gipahimangnoan usab ni Col. Marantan ang tanang miyembro sa kapulisan sa Davao nga magpadayon sa pagpakita og pagkamatinuoron ug integridad, dili lamang sa ilahang trabaho kundi lakip na usab sa ilahang tagsa-tagsa ka mga pamilya.
