Nasikop sa kapulisan ang 32-anyos nga pulis nga si Police Corporal Awang, sakop sa Davao City Mobile Force, tungod sa kalapasan sa R.A. 9165 o Comprehensive Dangerous Drugs Act of 2002 ug robbery-extortion.
Nadakpan siya atol sa entrapment operation nga gipahigayon alas 4 sa hapon sa KM 10, National Highway, Barangay Sasa, Davao City.
Sumala sa report, naaktohan ang suspek nga nakignegosasyon sa reklamante ug nadakpan mismo sa dihang iyang gidawat ang ₱30,000 nga marked money.
Nakuhaan usab kini og shabu nga gibug-aton og 4.8 grams atol sa operasyon.
Human sa pagdakop, gidala dayon si Police Corporal Awang sa Bunawan Police Station alang sa dokumentasyon ug pormal nga pagpasaka og kaso.
Ang suspek karon mag-atubang sa mga kasong kriminal nga paglapas sa R.A. 9165 ug robbery-extortion, ingon man sa administratibong kaso sa grave misconduct, nga mahimong hinungdan sa iyang pagtangtang sa serbisyo.
Gipasalig sa Davao City Police Office nga ipadayon nila ang internal cleansing aron masiguro nga walay miyembro sa kapulisan nga malambigit sa ilegal nga kalihokan.
