DAVAO CITY – Gipasalig sa Public Safety and Security Command Center (PSSCC) head Angel Sumagaysay nga magpatuman gilayon sila ug adjustment sa Roxas Night Market sa higayon nga magpagula ug bag-ong guidelines ang Davao City Covid-19 Task Force.
Tipik lamang gihapon kini sa pagdagsa sa daghanang tawo sa lugar nga posibleng mamahimong hinungdan na sab sa surge sa covid-19.
Kahinumduman nga ilalom sa alert level 1, gitangtang na ang tanan nga mga restrictions hinungdan nga mamahimo na nga makaadto ang mga tawo sa bisan asa man nga lugar.
Hinuon gipasalig sa PSSCC nga ipatuman sa otoridad ang hugtanon nga mga polisiya sa Roxas night market sama na lamang sa pagsuot ug facemask ug paghugas sa kamut sa higayon nga musulod.
Usa ka semana sukad nga gi-ablihan ang night market, kamatikdan pa gihapon ang taas nga linya sa mga tawo timailhan nga naghinam-hinam ang mga nahisgutan ilabi na nga duruha ka tuig sab kini nga gipasirad-an sukad nga nagsugod ang covid-19 sa milabay nga tuig.
Nanawagan na lamang ang otoridad sa mga musuroy sa lugar nga magsuot ug tarung sa ilang facemask ug kung mamahimo magdala ug kaugalingon nga alcohol.
