DAVAO CITY – Magpadayon na sugod karong adlawa ang pagparehistro alang sa Philippine Identification System kon PhilSys ID dinhi sa Dakbayan sa Davao, pinaagi sa pakig-alayon sa SM Malls ug sa Philippine Statistics Authority Davao del Sur.
Kini human gitugutan na sa Davao City LGU ang pagpahigayon niini human nga napahunong ang PhilSys registration niadtong bulan sa Mayo gumikan sa taas nga COVID-19 cases sa Dakbayan.
Nahimutang ang registration sites sa 3rd Floor sa SM City Davao sa Ecoland, ug sa Cinema Lobby sa SM Lanang Premier. Abli ang duha ka sites matag Lunes hangtod Biyernes, alas 8 sa buntag hangtod alas 4 sa hapon.
Giklaro usab ni PSA Davao del Sur Chief Statistical Specialist Randolph Anthony Gales nga kinahanglan usa mag-set og appointment sa register.philsys.gov.ph aron malikayan ang panagtapok ug mamintinar ang physical distancing sa duha ka sites.
Pasabot niini, bawal ang walk-in registrants.
Mapasalamaton usab ang PSA sa pakig-alayon sa SM Malls aron daghang Pilipino pa ang maakomodar sa National ID registration.
Wala pa usab detalye kung kanus-a muabli og balik ang barangay registration sites alang sa National ID dinhi sa Dakbayan.
