DAVAO CITY – Nanawagan ang Police Regional Office 11 ngadto sa United Nations nga imbestigahan ang pagpatay sa tribal leader nga gipaluyohan sa New Peoples’ Army sa Talaingod, Davao del Norte.
Matud pa kang PRO 11 spokesperson C/Insp. Andrea dela Cerna, usa ka tin-aw nga kalapasan sa tawhanong katungod ang gihimo sa mga rebelde gumikan kay gi-atake sa mga nahisgutan ug gipamatay sila si Datu Banadjao Mampaundag ug anak niini nga si Jhonard sa Sitio Igang, Barangay Palma Gil sa nahisgutan nga probinsiya.
Gitataw sab ni Dela Cerna nga human sab ang nahisgutan nga pagpamusil, gipabuthan sab sa mga rebelde ang miresponde nga ambulansiya ug improvised explosive device (IED).
Daghanan sab sumala pa nga mga sibilyan ang nakasaksi sa gihimong pagpangatake sa mga rebelde.
Plano sab sa pamilya sa biktima nga moduso ug batok sa mga rebelde apan nakadesisyon ang mga nahisgutan nga himuon na lamang kini human ang lubong.
Samtang sa bahin ni Davao del Norte Police Provincial Office (DNPPO) Investigation and Detective Management Section head Chief Insp. Werenfredo Regidor, gikanayon niini nga pasakahan nila ug duruha ka ihap sa kasong murder ang mga suspek.
Kahinumduman nga dose ang gitudlong mga suspek diin siyam niini ang nailhan na apan dili lamang una ipagula ang pangalan sa mga nahisgutan gumikan kay nagpadayon pa ang imbestigasyon sa otoridad.
