DAVAO CITY – Padayon pa nga giimbestigahan karon sa Pantukan Municipal Police Station kung si kinsa ang mipatay sa usa ka aktibista nga gipusil sa “riding-in-tandem” pasado alas 10:00 kagahapon sa buntag sa Pantukan, Compostela Valley.
Matud pa kang Hector Buscayno miyembro sa Hugpong sa mga Mag-uuma sa Walog Compostela nga ang ilang kaubanan nga si Edwin Catog ang gipusil sa duruha ka mga lalaki nga sakay sa motorsiklo dihang naglakaw kini aron nga mopalit ug isda.
Gikan sumala pa sa ilang panimalay si Catog, 45, residente sa Purok 1 Less, Barangay Fuentes dihang nahitabo ang insidente.
Gitataw sab ni Buscayno nga wala siyay uban nga nakitang motibo sa krimen gawas lamang sa pagkalambigit niini sa progresibong kalihokan.
Nasayran nga ayha pa man nahitabo ang insidente, nagkauban sumala pa si Buscayno ug Catog sa usa ka protesta sa Madaum Agrarian Reform Beneficiaries Association Inc. (MARBAI) sa Tagum City kaniadtong Disyembre sa milabay nga tuig.
Sa nahisgutan nga panahon, aduna sumala pay usa ka wala mailhing lalaki ug armado ang ilang gituohan nga gwardiya ang nangutana kanila sulod sa compound kung unsa ang ilang rason sa pagsalmut sa protesta sa Marbai.
Apan gitubag sumala pa kini ni Buscayno nga nagpadayag lamang sila sa ilang suporta sa mga mag-uuma nga nag-demand sa pag-angkon sa ilang mga luna.
Gawas sa pagkalambigit niini sa progresibong grupo, subayon sab sa kapulisan kung walay personal nga nakabangi ang biktima.
