Gipadali sa House prosecution panel ang pagmarka sa mga ebidensya sa impeachment case batok kang VP Sara Duterte aron mahuman ang pre-trial process sa dili pa magsugod ang impeachment trial sa Hulyo 6. Gipadayag ni House Lead Prosecutor ug Batangas 2nd District Rep. Gerville Luistro nga nagpadayon sa pagkakaron ang paghisgot ug pagmarka sa mga dokumentaryong ebidensya alang sa unang duha ka Articles of Impeachment nga may kalabotan sa confidential funds ug giingong unexplained wealth.
Sumala pa niini, gilauman sa prosecution panel nga makapagawas ang Senate Impeachment Court og pre-trial order human makompleto sa duha ka kampo ang marking of evidence. Matud pa ni Rep. Luistro, ang maong pre-trial order maoy magsilbing giya sa impeachment trial ug maglangkob sa mga gikasabutang kamatuoran, listahan sa mga testigo, mga ebidensya ug iskedyul sa mga hearing. Dugang pa niini, giingon sa House Lead Prosecutor nga magpabilin gihapon ang iskedyul sa pagsugod sa impeachment trial sa Hulyo 6 bisan pa sa mga hagit nga nasinati atol sa pre-trial proceedings.
Lakip sa gihangyo sa prosecution panel ang pagdugang og usa pa ka grupo aron mapaspasan ang pagmarka sa daghang mga ebidensya nga ilang gitrabaho. Apan, wala kini gisugtan sa kampo sa depensa nga mitumbok sa kakulang sa mga abogado isip usa sa mga hinungdan. Sa kasamtangan, nagpadayon ang pre-trial process samtang nag-andam ang duha ka kampo alang sa pormal nga pagsugod sa impeachment trial batok kang VP Sara Duterte.
