DAVAO CITY – Anaa na sa lima ka mga Local Government Unit (LGUs) sa rehiyon sa Davao ang nagpadayon sa pagpatuman sa Strategic Helpdesk for Information, Education, Livelihood and Other Development Interventions kon SHIELD program.
Kini ilawom sa proyekto sa Department of Social Welfare and Development (DSWD).
Sumala ni Mr. Dan Niel Salvador, DSWD Region XI SHIELD focal person atol sa gipahigayong Kapehan sa Dabaw karong adlawa, tumong sa maong programa sa DSWD nga ma-establisar ang “operational data management system” aron sayon mahibal-an ang kinatibuk-ang populasyon sa child laborers, pagpatukod sa Brgy. HelpDesk aron mapadali ang paghatag og serbisyo ngadto sa mga bata nga nakasinati og “child labor” ug ang pagpakaylap sa impormasyon mahitungod sa child labor.
Gibutyag usab ni Salvador nga ma-konsidera lamang ang indbidwal isip miyembro sa child labors kung anaa sila sa 17-anyos paubos nga pangidaron ug gipugos sa delikado nga mga trabaho nga nakaapekto sa ilahang kaugmaon.
Sa kasamtangan, ang Davao City, Panabo City, Magsaysay, Asuncion ug Nabunturan palang sa rehiyon onse ang nagpatuman sa SHIELD program nga nagsugod kaniadtong Hulyo 21, 2022 ug gilauman pang matukod sa tanang LGU sa Davao Region.
Kahinumduman nga base sa bag-ohay lamang nga datos, kapin 108 ka mga bata sa tibouk rehiyon ang kasamtangang nakasinati og ‘child labor’.
Via || Bombo David Francisquete
