Nagpabilin nga dakong hagit ang operasyon sa garbage collection sa syudad tungod sa limitadong ekipo ug kalisod sa agianan padulong sa Magtuod landfill. Matod ni Engr. Lakandiwa Orcullo, acting head sa Environmental Waste Management Division, 153 ka garbage trucks ang ginapadala matag adlaw. Apan, tungod kay usa ra ka bulldozer ang lig-ong nagagamit, malangan ang dumping sa basura ug usahay kaisa ra makabalik ang mga truck sa landfill.
Kasamtangan, duha ka bulldozers ang gina-ayo samtang duha pa ka bag-ong units ang ginapaabot. Dugang pa ni Orcullo, nahurot na ang P370 milyon nga pondo sa garbage collection budget hangtod Setyembre. Tungod niini, gikinahanglan ang dugang nga P132 milyon, diin P90 milyon niini ipahinungod lamang sa gasto sa hauling.
Gisaysay usab sa opisyal nga tungod sa kadaut sa dalan, ang mga garbage trucks mapugos na muagi sa Los Amigos, nga nagdugang og 54 kilometros sa rota ug nakapasaka sa gasto sa operasyon. Bisan pa man sa kalisod, gipasabot ni Orcullo nga padayon gihapon ang serbisyo ug wala nay kalangan sa pagkuha sa basura sa mga barangay.
