Gipasidaan sa Police Regional Office XI nga hugot nga ipatuman niini ang seguridad alang sa umaabot nga National Peace Rally nga gipangulohan sa Iglesia ni Cristo karong adlawa.
Apan, sumala ni PMaj. Catherine Dela Rey, ang tigpamaba sa PRO XI, bisan paman nga walay dagkong aktibidad, dugay na niini matud pa mga ginahugtan ang seguridad ning dakbayan sa dabaw.
Dugang pa niini, nga magpadayon matud pa ang ilang pagka-istrikto sa pagpatuman sa mga ‘security measures’ aron masiguro ang kalinaw ug kahapsay sa syudad samtang nagpadayon ang maong rally.
Nagpahinumdom usab kini sa mga gustong musalmot sa rally nga magtuman kanunay sa mga regulasyon nga ipagawas sa awtoridad aron malikayan ang kagubot ug magpabiling hapsay ang kalihokan.
Gibana-banaan nga mokabat sa kapin 300,000 hangtod 500,000 ka mga myembro sa Iglesia ni Cristo ang musalmot sa rally, diin ang uban magagikan pa sa 12 ka mga lokal nga distrito sa Region 11 ug Region 12.
Gamiton matud pa sa grupo ang 100 ka mga bus nga naggikan sa Davao Del Norte, samtang adunay usab 120 ka bus gikan sa Sultan Kudarat nga maoy sakyan alang sa uban pang mga miyembro.
Samtang, pasado alas-otso kagabie, misugod na og abot ang musobra sa 300 ka passenger van nga adunay kapin 5,000 ka tawo ang sakay nga nag-gikan sa Maguindanao, nga musalmot usab sa rally.
