DAVAO CITY – Nagpadayon gihapon ang ginapahigayong one time big time operation sa Police Regional Office 11 kauban ang mga sangay sa kapulisan sa tibuok rehiyon.
Sumala pa sa PRO 11, nakapahigayon na ug kapin 89 ka mga buy bust operations diin 89 na ka mga drug presonalities ang ilang malampusong gidakop gikan Agosto 12 hangtud 21 ning tuig kasamtangan.
Sa nahisgutang ihap sa mga nadakpan, 10 niini ang high value ug 56 ang street level individuals.
Samtang muabot sa kinatibuk-ang 132 gramos kon nasa P1.6 million pesos ang kantidad sa nakumpiska nga gituohang ilegal nga droga.
Nanguna ang Davao City Police Office sa may pinakadaghang operasyon nga gilusad ug drug personalities nga nasikop, samtang nagbaton ug pinakadaghang droga nga nasakmit ang Davao del Sur Police Provincial Office.
Ginapaniguro sa PRO 11 ang ilang tiunay nga serbisyo aron panalipdan ang katawhan kontra ilegal nga droga.
Nag-awhag sab sila sa katawhan nga dili mahadlok sa pag-report sa pinakaduol nga police station kon ugaling makakita ug susamang krimen.
VIA || Bombo LJ Florendo
