Mihimo og picket rally kagahapon sa buntag, sa Freedom Park, ning dakbayan sa Davao ang Anakbayan SMR aron ipanawagan ang usa ka pro-people nga transport modernization program.
Ang rally usa ka tubag sa paspas nga pagpahigayon sa Davao Bus Project (DBP), nga kabahin sa Davao City Public Transport Modernization Project (DCPTMP) nga nagtinguha nga bag-ohon ang sistema sa transportasyon sa siyudad pinaagi sa pag-phase out sa mga jeepney ug pag-ilis niini og modernong bus.
Gipasabot ni Anakbayan SMR Chairperson Fauzhea Guiani ang kamahinungdanon sa pakig-uban sa kabatan-onan sa sektor sa transportasyon tungod kay ang DBP dako ang epekto sa mga drayber ug commuter, nga iyang giila nga anti-people.
Kahinumdumn nga niadtong Oktubre 2025, misulod sa Davao City ang 10 ka modernong bus nga gi-import gikan sa China isip kabahin sa pre-implementation sa DCPTMP.
Ang mga bus unta maghatag og libre nga sakay sa peak hours sugod sa tunga-tunga sa Nobyembre 2025, apan hangtod karon wala pa kini nag-operate sa syudad.
Gibutyag ni Guiani nga ang plano nga operasyon sa mga bus usa lang ka trial run sa DBP aron ma-mind conditioning ang mga commuter nga dawaton ang proyekto, ug ang gasto alang sa mga bus dili makatarunganon.
Gipasabot usab niya nga ang DBP dili solusyon sa krisis sa transportasyon sa siyudad, tungod sa dili reguladong pag-import sa gobyerno sa mga pribadong sakyanan ug modernong bus.
Naghatag usab si Guiani og alternatibo sa DBP, lakip ang rehabilitasyon ug pagbalik sa 5-ka-tuig nga franchise validity sa mga jeepney.
Samtang gipaklaron sa nahisgutan nga dili sila batok sa modernization, apan ang mga proyekto nga anti-people sama sa DBP angayan sumala pa kini nga supakon.
