DAVAO CITY – Bisan nga dyutay na lamang ang ihap sa mga kapulisan sa rehiyon nga wala nabakunahan, padayon sumala ang pag-awhag sa Police Regional Office (PRO)-11 sa mga nahisgutan nga magpabakuna aron nga adunay igong proteksiyon ang kaugalingon batok covid-19 ilabi na karon nga aduna namatikdan usab nga bag-ong variant niini.
Una ng gipasigarbo ni Police Major Eudisan Gultiano, tigpamaba sa PRO-Davao nga halos 100 ka porsyento na sa mga kapulisan sa Davao region nabakunahan ug 68 na lamang ang nahibilin nga unvaccinated.
Sagad sa mga rason niini ang ilang tinuhoan ug kondisyon sa panglawas. Una ng nasayran nga anaa na karon sa 9,600 ang fully vaccinated samtang usa ka personnel ang wala mihatag ug igong rason nganong dili kini magpabakuna.
Gitataw sab sa opisyal nga kadtong mga unvaccinated nga mga personnel ang i-re-assign sa administrative work ug dili mamahimong i-deploy sa field.
Samtang bisan nga wala gipatuman, gibutyag sab sa nahisgutan nga ang “no vaccine, no work” policy mamahimong hinungdan sa administrative charges batok sa unvaccinated personnel.
Apan mamahimong dili mahilakip niini ang mga indibidwal nga adunay special cases sama na lamang kung kini adunay health reasons, allergies ug buntis nga personnel.
Sa kasamtangan, anaa sumala pa sa duruha ka aktibong kaso sa PRO-11 ug 1,404 recoveries gikan sa 1,409 ang kumpirmadong kaso.
