DAVAO CITY – Nanawagan karon ang kapulisan ilabi na ang Police Regional Office (PRO) 11 ngadto sa publiko nga i-report gilayon ang mga mahitabong pagpangabuso aron malikayan ang pagsaka sa ihap niini karong panahon nga gipailalom ang dakbayan sa quarantine.
Sumala pa kang Pol. Maj. Jaqueline Antero, section chief Regional Women and children protection desk (PRO) 11, nga anaa sa kapin 200 ka mga gender based violence ang ilang natala sa milabay nga Marso 16 hangtud Hunyo 16 diin sagad sa mga nahitabo sa nahisgutan nga panahon ang gilangkuban sa rape, acts of lasciviousness, serious physical injury, ug anti trafficking in person.
Una na sab nga nasayran kang Antero nga dili lamang sab sa mga urban areas mahitabo ang pagpangabuso kung dili lakip na sab sa mga rural areas sa dakbayan.
Samtang gibutyag sab ni Lorna Mandin, hepe sa Integrated Gender and Development Division ning dakbayan, nga padayon ang ilang pagtambag sa mga ginikanan sa mga angayan nga himuon aron nga malikayan ang pagpangabuso ilabi na sa mga bata.
Gani mamahimo sab nga tudloan ang mga kabataan ilabi na ang mga babaye kung unsa ang mga angayan nila nga himuon sa higayon sa higayon nga mabiktima sila sa pagpangabuso.
