Nagpahigayon ang Police Regional Office 11 (PRO 11), kagahapon, og usa ka seremonya aron ipasidungog ang adlaw sa nasudnong paghinumdom sa dakong sakripisyo sa SAF 44, inubanan sa tema nga “Courage Beyond Measure: Remembering the Sacrifice of the SAF 44 for Peace” pinaagi sa usa ka Misa sa St. Peter the Apostle Chapel, sulod sa maong kampo.
Ang kalihukan nagpasidungog sa kaisog ug hingpit nga sakripisyo sa mga tropa sa Special Action Force (SAF) nga mihatag sa ilang kinabuhi sa trahedya nga engkwentro sa Mamasapano kaniadtong 2015.
Sa usa ka dekada nga pagpadayon isip pasidungog sa PRO 11 sa kaisog ug dedikasyon sa mga SAF 44 Commandos ug sa mga mipanaw nga kauban niini sa operasyon sa kapulisan, nga nagpasabot nga ang ilang mga sakripisyo magpabilin nga mahinumduman ingon man usa kini ka pamatuod sa walay puas nga pagkamakanunayon sa Philippine National Police (PNP) alang sa kalinaw ug hustisya.
Ang seremonya naglakip sa usa ka minuto nga kahilom, usa ka audio-visual presentation (AVP) nga nagpakita sa kaisog ug labing bag-ong pagka-patriotismo sa mga trooper.
Gisiguro sa PRO 11 nga ang kapolisan magpabilin nga malig-on sa ilang misyon alang sa kaluwasan ug seguridad sa matag usa.
Nahuman ang kalihukan sa usa ka pamalandong ug mainit nga nota, uban sa mga pagkaon nga giandam alang sa tanang nanambong, nga mihatag og oportunidad alang sa paghinumdom sa kaisog ug sakrispisyo sa SAF 44.
