DAVAO CITY – Nagpadayag ang Police Regional Office (PRO) sa Davao Region ug pagka-alarma human nasayran nga adunay bata nga namatay sulod sa United Church of Christ in the Philippines (UCCP) Haran tungod sa pneumonia, nga usa ka sintomas sa coronavirus disease (Covid-19).
Gikahadlokan karon ang posibleng kontaminasyon sulod sa pasilidad diin nagtinir ang anaa sa 700 ka mga Lumad.
Sumala pa kang PRO-Davao Director Police Brigadier General Filmore Escobal, nakadawat sila ug report nga anaa sa walo ka bulan nga bata nga anaa sa sulod sa haran ang namatay.
Gilubong kini sa Madapo Cemetery kaniadtong Mayo 9, 2020 human namatay ug gikalot kaniadtong Mayo 13 sa mga personahe sa Davao City Police Office (DCPO), Scene of the Crime Operatives (Soco) ug mga opisyal sa 8-A Poblacion District, Bankerohan ning dakbayan aron nga ipailalom sa otopsiya.
Una ng gibutyag sa social workers sa City Social Welfare and Development Office (CSWDO) nga atol sa ilang relief goods distribution sa UCCP Haran sa Father Selga Street. Ilang nasayran nga usa ka mentally-challenged ang inahan niini.
Sa kasamtangan, wala pay resulta nga makahatag kung ang bata infected sa Covid-19 apan wala nila gipadaplin ang posibilidad nga namatay kini kini tungod sa Covid-19 nga maoy hinungdan nga posibleng mabutang sa risgo ang kinabuhi sa mga tawo nga anaa sulod sa maong compound.
