DAVAO CITY – Gipasalig sa Police Regional Office (PRO) 11 nga magpahigayon gilayon sila ug imbestigasyon kalabot sa mga Police officers ning siyudad nga gilambigit ni retired SPO3 Arthur Lascañas sa grupong Davao Death Squad (DDS) nga gikanayong mipaluyo sa mga pagpamatay sa siyudad sa milabay nga katuigan.
Matud pa kang Police Chief Inspector Andrea dela Cerna gimando sa PRO regional director ang pagsubay sa record sa mga giduhig nga mga Police officers ug sutaon sab nila kung nagpabilin pa sa serbisyo ang pipila niini.
Hinuon gitino ni dela Cerna nga dili na nila mamahimong ipatawag sa ilang buhatan ang mga gipangtudlo ni retired SPO3 Lascanas sa higayon nga dili na kini aktibo o wala na sa serbisyo.
Tipik lamang kini human nga gibutyag ni Lascanas sa pagdungog sa senado nga adunay pipila ka mga Police officers sa Davao ang kauban niya sa pagpatay sa gitudlong kriminal.
