DAVAO CITY – Gipasalig karon sa Police Regional Office (PRO)-11 nga gipahimangnoan niini ang ilang mga sakop nga dili malambigit sa bisan unsa man nga klase sa partisan politics ilabi na karon nga nagpadayon ang pagduso sa Certificate of Candidacy (COC) latas sa nasod.
Tipik lamang kini human ang pahimangno ni PNP chief General Guillermo Eleazar nga kinahanglan likayan sa mga PNP personnel ang pagpadayag ug suporta sa mga kandidato mapa-lokal man o national.
Kinahanglan sumala pa nga barugan sa sa PNP nga usa sila ka professional organization. Angayan sumala pa nga ipabilin sa kapulisan ang loyalty sa Constitution ingon man sa katawhang Pilipino ug dili sa mga bisan kinsa man nga kandidato.
Sa kasamtangan, gipalig-on na sab sa kapulisan ang ilang kampanya batok loose firearms ug Private Armed Groups (PAGs) isip kabahin sa sayo nga pagpangandam sa election security preparations alang sa malinawon, matinud-anon ug hapsay nga national and local elections sa mosunod nga tuig.
Una niini, nahimong malinawon ang pagduso sa Certificate of Candidacy sukad nga gisugdan kini sa milabay nga adlaw.
Gipasalig sa kapulisan nga bastante ang ilang mga sakop aron nga magpatuman ug kahapsay sa Comelec hangtud nga matapus ang filing sa COC karong adlaw nga biyernes, Oktubre 8, 2021.
