Gipamatud-an sa Police Regional Office 11 (PRO11), nga gipangulohan ni Regional Director PBGEN Leon Victor Z. Rosete, nga usa ka pulis nagpositibo sa paggamit ug illegal nga droga sa New Bataan Police Station atol sa gipahigayon nga random drug test, isip kabahin sa internal cleansing program sa PNP.
Matud sa PRO11, hugot ang ilang baruganan nga ang tanang pulis kinahanglan walay kalambigitan sa ilegal nga droga aron masiguro nga makaserbisyo sila sa publiko nga matinud-anon ug adunay integridad.
Gipahayag usab sa PRO11 ang ilang pagtahod sa transparency sa katawhan, hinungdan nga ilang gipahibalo ang resulta sa maong test. Ang pulis nga nagpositibo moagi sa hustong proseso ug angay nga silot ubos sa pagbantay sa disciplinary board. Ingon man magpadayon ang PRO11 sa pagbuhat og random drug tests aron maseguro nga limpyo ug angayan ang mga sakop sa organisasyon.
Apan, gipasabot usab sa PRO11 nga walay kamatuoran ang mikaylap karon nga sayop nga impormasyon online sa usa ka Vlogger nga naggamit sa litrato ug pangalan ni Police Major Catherine V. Dela Rey, ang opisyal nga tigpamaba sa PRO11, ug nag-ingon nga siya kuno nagpositibo sa illegal nga droga.
Kini nga pasangil usa ka fake news ug usa ka seryosong isyu nga posibleng ipasaka og legal nga aksyon. Gani, kahibaloang padayon nga nagserbisyo si PMAJ Dela Rey sa maayong kahimtang ug adunay integridad. Gibarugan sa PRO11 ang ilang misyon nga limpyohan ang sakop sa kapulisan ug ipanalipdan ang dungog sa mga walay sala.
