Nagpagawas og pahayag ang Police Regional Office 11 (PRO 11) pinaagi ni PBGen. Leon Victor Z. Rosete, kabahin sa mikatag nga memorandum bahin sa posible nga deployment sa mga personahi gikan sa Davao City Police Office (DCPO) paingon sa Bangsamoro Autonomous Region in Muslim Mindanao (BARMM) alang sa umaabot nga 2025 National ug Local Elections (NLE) ug BARMM Parliamentary Elections (PE).
Gipaklaro niini nga ang memorandum misaysay nga magpahigayon og medikal nga eksaminasyon sa tanan nga deployable personnel aron masusi sumala pa ang ilang kahimtang sa panglawas ug masiguro nga ang kapolisan himsog sa pisikal ug mental alang sa maong deployment.
Kini nga proseso nagsunod sa Addendum sa Health Service IMPLAN sa PNP CMC Guidelines ug Procedures alang sa seguridad sa 2025 nga mga eleksyon.
Gipasabot sa PRO 11 nga ang memorandum wala nagpasabot og reassignment o ang pag-balhin sa mga personahi gikan sa DCPO paingon sa BARMM, apan nakalatid lamang sa mga kinahanglanon nga preparasyon aron masiguro ang usa ka luwas, segurado, ug transparent nga eleksyon.
Ang PNP nagpadayon sa ilang tinguha nga magserbisyo ug magpanalipod sa integridad sa umaabot nga 2025 eleksyon.
