DAVAO CITY – Gipakita sa mga myembro sa LGBTQ+ community ang ilahang panaghiusa dungan sa gipahigayong Duaw Davao Pride Parade kagahapon, Hunyo 23 ning dakbayan.
Nanukad sa pagmartsa ug pagwara-wara ang mga LGBT groups and coalitions, mga pampubliko ug pribadong grupo ug mga allies sa komunidad gikan sa Roxas Avenue hangtod sa Rizal Park.
Napuno sa mga kolor sa bangaw kon rainbow ang mga kadalanan sa dakbayan sa pagrampa sa mga drag queens, drag performers, beauty queens ug mga nagkalain-laing LGBT groups ning dakbayan.
Gibana-banaang anaa sa 8,000 ka mga partisipante ang nisalmot sa maog kalihukan.
Mipaambit sab sa iyang presensya ug suporta alang sa mga myembro sa komunidad si Vice President Sara Duterte nga game sab magpakuha og hulagway sa mga katawhan sa parada.
Sa iyang pamahayag, gikanayon sa bise nga ang Pride Month nagsilbi nga pahinumdom sa gahum sa gugma batok sa pagdumot, diskriminasyon, ug kawalay pagtagad sa sektor sa LGBT nga sa kasaysayan gipailalom sa kaulawan, paglutos, ug dili makiangayon nga mga oportunidad sa kinabuhi.
Pagkagabii dihang gilingaw sab sa mga Dabawenyo drag performers ang Rizal Park alang sa Hugyaw Davao: Night of Fun and Colors.
Sa kinatibuk-an, nahimong hapsay ang dagan sa seguridad atol sa maong kalihukan. Kabahin ang nahisgutang mga katikaran sa nagpadayong Duaw Davao Festival 2024.
