Gilauman nga magpadayon ang pagkunhod sa presyo sa diesel sa mga gasolinahan karong Abril 28, nga posibleng mokunhod og hangtod P10 matag litro.
Kini na ang ikatulong sunod-sunod nga semana sa rollback sa presyo sa petrolyo.
Base sa unang upat ka adlaw sa trading, sumala sa usa ka tinubdan sa industriya, mahimong moubos ang presyo sa diesel og P8 hangtod P10 matag litro.
Samtang ang gasolina, posible nga mosaka og P1 matag litro o magpabiling walay kausaban.
Sukad nagsugod ang gubat sa Middle East niadtong Pebrero 28, misaka og dako ang presyo sa petrolyo, ilabina sa diesel, nga kada semana adunay double-digit increase.
Apan tungod sa mga pahayag sa ceasefire ug posibleng kasabotan sa kalinaw tali sa mga lider sa United States, Iran, ug Israel, nihinay ang pressure sa presyo sa global oil market.
