Gipalig-on sa Davao City Police Office (DCPO) ang seguridad sa mga kandidato nga magpahigayon og campaign rally sa lungsod, ilabi na karong nagkadool ang 2025 midterm elections. Sa interbyu kang Police Captain Hazel Caballero Tuazon, ang tigpamaba sa DCPO, iyang gibutyag nga kabahin sa deployment ang mga sakop sa Special Weapons and Tactics (SWAT) aron masiguro ang kaluwasan sa mga kandidato ug katawhan atol sa ilang kalihokan.
Sigon ni Tuazon, hugot ang direktiba ni DCPO City Director Police Colonel Hansel Marantan nga walay kagubot nga mahitabo samtang nagapadayon ang mga political gatherings. Matod pa niini, nga ang tanang hepe sa mga support unit ug station commanders sa DCPO gimandoan na nga motabang sa pagbantay ug paghatag og proteksyon sa tanang kandidato nga adunay rally o bisan unsang aktibidad.
Kahinumduman nga nasurprisa ang mga residente sa Barangay 76-A sa dakbayan sa Davao tungod sa presensya sa daghang pulis nga naka-full battle gear atol sa campaign rally. Apan gipasabot sa DCPO nga kini kabahin lang sa ilang preventive measure aron malikayan ang posibleng hulga ug masiguro ang malinawon nga eleksyon.
