Hugot nga gibantayan sa Armed Forces of the Philippines (AFP) ang padayon nga presensya sa dili moubos sa 90 ka dili awtorisadong barko sa China sulod sa West Philippine Sea niadtong Marso 2026.
Sumala kang Philippine Navy spokesperson Rear Admiral Roy Vincent Trinidad, ilahang namonitor ang padayon nga presensya sa People’s Liberation Army Navy (PLA-N) ug China Coast Guard (CCG) sa mga mahinungdaong teritoryo sa nasud.
Ang labing daghan nga presensya natala sa Bajo de Masinloc nga miabot sa 49 ka barko (17 PLA-N ug 32 CCG).
Gisundan kini sa Pag-asa Island nga adunay 15 ka sakayan, Ayungin Shoal nga adunay 14, ug Escoda Shoal nga adunay 12 ka mga barko.
Gibutyag ni Trinidad nga ang maong mga paglapas kabahin sa dautang tuyo sa Beijing batok sa soberanya sa Pilipinas.
Bisan pa sa tensyon, mipadayag ang opisyal nga dili moatras ang armadong kusog sa pagbantay sa kadagatan.
Sa kinatibuk-ang datos sa militar niadtong Marso, miabot sa 22,755 ka sakayan ang misulod sa maritime zones sa Pilipinas.
Sumala pa, 19,328 niini ang foreign-flagged samtang 3,428 ang lokal.
Bisan pa nga 14,990 ka barko ang misunod sa international protocols, adunay 7,765 ka sakayan nga wala motubag sa radio challenges sa gobyerno.
